• Glista Libra Wahlkampf 2010

Göri Klainguti


Samedan,
Pur,
sainza partieu, 1945,
gklainguti(at)bluewin.ch



Stüdger sainza decider es
Da cacalari
Be quel am pera auncha pês
Chi fo'l cuntrari


La magiurited dal cussagl da cumön ho impedieu cha vegna discus la dumanda da singulas chesas da fliamaint a la periferia da l’Engiadin’Ota scu eir da stüdger a fuonz scha Promulins nu füss pü adatto scu lö per üna nouva chesa da fliamaint cu il lö davous l’ospidel. Be ün chesamaint centrel davous l’ospidel d’eira lur visiun. A vaivan perfin fat la proposta d’uorden da serrer la discussiun. Illa votaziun chi ho seguieu s’ho alura quella magiurited expressa cunter mincha otra pussibilted da chüra.


Sustegn meritan ils hotels:
lets chods stuvains fer render.
Sustegn però nu dains a quels
chi fraids prouvan da vender.


Bod in mincha vschinauncha in Engiadin’Ota as fo actuelmaing progets d’hotel - que chi es positiv perche cha la gestiun dad hotels porta guadagn a tuot la populaziun. Ma quists nouvs progets faun bod tuots il quint da pudair gnir finanzchos tres la vendita da seguondas abitaziuns chi vessan da gnir permissas a basa da l’artichel d’excepziun (7.2.) dal plan regiunel reguard seguondas abitaziuns. Il plan regiunel vaiva limito la vendita da seguondas abitaziuns a 12’000m2 l’an per l’Engiadin’Ota. Ma scha vegnan permissas excepziuns a l’ingranda rivarons bainbod ad üna cifra pü ota cu aunz la contingentaziun e quelo es dad eviter in mincha cas.


 

 

Pü gross l’inserat

Pü meger l’argumaint

 

 

göri, pilot + etiquettensvindler diplomo



„Nus fains tuot“

Ün fögl volant dad aderents d’üna chesa da fliamaint davous l’ospidel fo crajer cha architects raffinos füssan buns dad eriger il nouv chesamaint eir süsom la costa, dimena be güsta davaunt la puraria existenta sü, da möd cha las abitantas ed abitants scu eir il persunel da fliamaint pudess giodair la pü bella vista da tuot Samedan.
Per me po nascher uschè ün’ideja be da la mentalited „Eau sun l’umaun e sun bun da fer tuot. Sch’eau resaint ün ferm giavüsch schi es que mieu dret e dovair eir da’l realiser.“
Üna chesa da fliamaint chi füss eretta süsom la spuonda pudess propi dvanter ün chastè cun vista magnifica. Ma füss quist chastè eir adatto pel fliamaint? Cu realisessan ils fervents aderents dal lö davous l’ospidel p.ex. lo lur sinergias? Cun tunnels e lifts e corridors suotterrauns?

Il problem dal fliamaint nu’s lascha schoglier cun quista mentalited. Güsta tal fliamaint nu vo que da cumander e spetter cha tuot il rest dal muond hegia da’s suottametter al cumand. Forsa badan quecò eir ils fervents aderents da la chesa da fliamaint davous l’ospidel, ün di ch’els stuvessan svessa gnir flios? O cumandessan els eir lo auncha inavaunt sainza üngün resguard ?